مشروع الموازنة العامة في سوريا لعام 2021. ربما الميزانية الاقل قيمة منذ نهاية التسعينيات .توقعات بزايدة الرواتب 100% .
اقر المجلس الأعلى للتخطيط الاقتصادي الاجتماعي في الحكومة السورية مشروع الموازنة العام لعام 2021 و بلغت 8,5 ترليون ليرة سوري . حاليا المشروع انطرح للنقاش بالبرلمان . متل العادة البرلمان و النواب ما رح يقدموا اي تعديل جوهري على المشروع . خلال الشهر الجاي رح يصادق البرلمان على مشروع الموازنة و رح يتم توقيعوا من رئاسة الجمهورية.
8,5 ترليون ليرة هو اعلى رقم بتاريخ الدولة السورية بالليرة بس فعليا ممكن يكون الاقل قيمة بالدولار من اكتر من عشرين سنة يعني من نهاية التسعينات .
تقريبا جميع دول العالم بتقر الميزانية مع تحديد سعر صرف العملة المحلية بالدولار . سعر صرف العملة المحلية بالموازنة العامة باغلب الدول بكون قريب جدا من سعر صرف السوق (يعني الاختلاف ما ممكن يكون اكتر من 5%). ممكن خلال العام تصير ازمات اقتصادية تأثر على سعر صرف العملة المحلية هالشي ممكن يسبب خلل بالنفقات . بس عند اقرار الميزانية سعر صرف الرسمي لازم يكون واقعي و مدروس .
عند اقرار الموازنات العامة في سوريا خلال سنوات الحرب كان في اختلاف بين السعر الرسمي المعتمد بمشروع الموازنة و بين السوق السودا . هالاختلاف كان قليل ببعض السنوات متل 2017 ,2018 ,2019 حوالي 10% . بس كان كبير كتير بسنوات 2013,2015 ,2016 و وصل احيانا ل 100%.
في حال اقرار موازنة 2020 مع تحديد سعر الصرف الرسمي ب 1250 ليرة للدولار الواحد . بيعني انو الفرق بين السعر الرسمي و السعر الحقيقي بالسوق ممكن يوصل للدبل او 100% . هالظاهرة سيئة جدا و مدمرة .
8,5 ترليون ليرة سوري يعني 6,8 مليار دولار على سعر صرف الرسمي 1250 ، و 3,7 مليار دولار على سعر السوق السودا اليوم 2300 .!!
رح نستعرض ارقام الموازنة العامة السورية من سنة 1996 لل 2021 بالليرة السورية و الدولار على حسب السعر الرسمي الحكومي . بسنوات الحرب صار في فرق كبير بالسعر . بس بالاحصائيات الاقتصادية بكل دول العالم بيعتمدوا على السعر الرسمي لهيك رح نحسب الميزانية بالدولار على السعر الحكومي حتى لو كان بيفرق كتير عن السعر الحقيقي بالسوق
1996 : 188 مليار ليرة سوري ، 3,6 مليار دولار .
1997: 211 مليار ليرة سوري ، 4 مليار دولار .
1998 : 240 مليار ليرة سوري ، 4,6 مليار دولار .
1999: 255 مليار ليرة سوري ، 4,9 مليار دولار .
2000 : 275 مليار دولار ، 5,9 مليار دولار .
2001 : 322 مليار ليرة سوري ، 7 مليار دولار.
2002 : 355 مليار ليرة سوري ، 7,7 مليار دولار .
2003 : 420 مليار ليرة سوري ، 8,1 مليار دولار. 2004: 475 مليار ليرة سوري ، 9,1 مليار دولار .
2005: 460 مليار ليرة سوري ، 9,2 مليار دولار .
2006: 495 مليار ليرة سوري ، 9,9 مليار دولار .
2007: 588 مليار ليرة سوري ، 11,8 مليار دولار .
2008: 600 مليار ليرة سوري ، 13 مليار دولار .
2009: 685 مليار ليرة سوري ، 15 مليار دولار .
2010: 754 مليار ليرة سوري ، 16,55 مليار دولار .
سنوات الازمة السورية :
2011 : 835 مليار ليرة سوري ، 18 مليار دولار ، سعر الصرف المعتمد 45,5 ليرة للدولار . نسبة عجز 5,78%.
2012: 1326 مليار ليرة سوري ، 24 مليار دولار ، سعر الصرف المعتمد 55 ليرة للدولار ،نسبة عجز 39% .
2013: 1383 مليار ليرة سوري ، 20 مليار دولار ، سعر الصرف المعتمد 67,5 ليرة للدولار ، نسبة عجز 56% .
2014 : 1390 مليار ليرة سوري، 8,6 مليار دولار ، سعر الصرف المعتمد 160 ليرة للدولار ، نسبة العجز 40,5% .
2015: 1554 مليار ليرة سوري ، 9,8 مليار دولار ، سعر الصرف المعتمد 158 ليرة للدولار ، نسبة العجز 38% .
2016 : 1980 مليار ليرة سوري، 7,92 مليار دولار ، سعر الصرف المعتمد 250 ليرة للدولار ، نسبة العجز 31 % .
2017 : 2660 مليار ليرة سوري، 5,17 مليار دولار ، سعر الصرف المعتمد 517 ، نسبة العجز 27% .
2018 : 3187 مليار ليرة سوري ، 6,3 مليار دولار ، سعر الصرف المعتمد 500 ليرة للدولار، نسبة العجز، 25,3%.
2019: 3882 مليار ليرة سوري، 8,9 مليار دولار ، سعر الصرف المعتمد 435 ليرة للدولار، نسبة العجز 0% !! (شلون و كيف ما حدا بيعرف
)
2020: 4000 مليار ليرة سوري ، 9,2 دولار ، سعر الصرف المعتمد 435 ليرة للدولار، نسبة العجز 35 % دون احتساب عجز الكهرباء البالغ 711 مليار ليرة (عأساس يضيفوه على موازنة 2021) .
بسنة 2011 كانت سوريا بالمرتبة 74 على مستوى العالم من حيث قيمة الموازنة العامة بنفس الصف تقريبا مع تونس و مع دول اوروبية صغيرة متل بلغاريا و صربيا و لاتفيا .
بسنة 2021 سوريا تقريبا حتكون بالمرتبة 100-105 عالميا بنفس الصف مع نيبال و السلفادور و بوتسوانا و ترينيداد و توباغو .
كتلة الرواتب و الاجور في الموازنات السورية:
ب 2011 كان متوسط الرواتب 9645 ليرة سوري يعني حوالي 200$ . و ضل عم ينزل تدريجيا لحتى وصل لاقل من 50$ شهريا (سعر الحكومي )او فعليا 20-30$ (سعر السوق السودا ) لاغلب الموظفين .
ب 2015 بلغت كتلة الاجور و الرواتب بالميزانية 312 مليار ليرة سوري ، بما يعادل 20% من الميزانية او 1,974 مليار دولار .
ب 2016 بلغت كتلة الاجور و الرواتب بالميزانية 372 مليار ليرة سوري ، بما يعادل 18% من الميزانية او 1,488 مليار دولار .
ب 2017 بلغت كتلة الاجور و الرواتب بالميزانية 432 مليار ليرة سوري، ما يعادل 16% من الميزانية او 837 مليون دولار.
ب 2018 بلغت كتلة الاجور و الرواتب بالميزانية 467 مليار ليرة سوري، ما يعادل 14,66 % من الميزانية او 934 مليون دولار .
ب 2019 بلغت كتلة الاجور و الرواتب بالميزانية 482 مليار ليرة سوري ما يعادل 12 %من الميزانية او 1,1 مليار دولار.
ب 2020 بلغت كتلة الاجور و الرواتب بالميزانية 500 مليار ليرة سوري ما يعادل 12,5% من الميزانية او 1,14 مليار دولار .
ميزانية 2021 لسا ما صدرت . كتلة الاجور و الرواتب بالميزانية رح تتراوح بين 12- 16% (حسب الدولة و كرمها) يعني متل باقي سنوات الازمة الماضية .
بالتالي قيمة الرواتب و الأجور ب 2021 لازم تكون بين 1020-1360 مليار ليرة.( 816- 1088 مليون دولار ).
بحب ذكر انو ب 2020 كانت قيمة الرواتب و الأجور 500 مليار و بالتالي قيمة الرواتب و الأجور بالليرة السورية بالسنة الجديدة رح تكون مضاعفة بسبب تضاعف قيمة تضاعف الميزانية بالليرة السورية .
بعد اقرار الميزانية من قبل مجلس الشعب و رئاسة الجمهورية خلال الشهر الجاي رح تكون الصورة اوضح و تحديدا كتلة الرواتب والاجور و نسبتها من مجمل الميزانية .
الزيادة بتوقع تكون بين 75-100% . الدولة رح تحاول تحافظ على متوسط رواتب 90-100$ (سعر المركزي ) يعني حوالي 100-120 الف ليرة (حوالي 50$على السوق السودا ) .
الشي يلي بشجع الدولة على رفع الرواتب هو رفع اسعار المحروقات يلي صار مؤخرا .
بكل الاحوال الظروف الاقتصادية بالبلد صعبة جدا ، قيمة الميزانية رح تنخفض بشكل كبير على الدولار . العقوبات خانقة و الحالة تعبانة جدا . الحل الوحيد هو حل سياسي دولي يرضي الكل لتلتغى العقوبات . غير هيك البلد ممكن يضل بأزمة اقتصادية لعشرات السنين بدول ما حدا يتدخل و يساعد او يساهم برفع الحصار و مساعدة هالشعب يلي تعب كتير .
عن صفحة
@soudky othman warkozek
ليست هناك تعليقات:
إرسال تعليق