ليش أفلامنا الجميلة مخباية بالدروج؟

علّقت سول مقدسي :

*لست بناقدة فنّية بس في بعقلي فكرة بدي بقّها ..
مبارح عملت حالي نشيطة ورحت حضرت فيلم بأول يوم بالسنة .. فيلم " بوط كعب عالي" حسب المقطع الترويجي حسيت أنه في كمية من الفكاهة والكوميديا ظريفة جداً..

الفيلم مشان ما استخدم كلام غير لطيف، "أبسط" من أنه نحضره أو نحكي في لأن المشاهد والفكرة يللي وصلتني كمية من الأفكار والصور السطحية عن المجتمع السوري باختلاف بيئاته..

بس الفكرة الأساسية يللي قهرتني أنه هيك فيلم مرق على الرقابة بس ما انمنع عرضه مع أنه عرض المشاكل التالية بطريقة تافهة:
- المدينة الجامعية هي بؤرة للفساد والممارسات اللا أخلاقية وبعلم ودعم من المسؤولين على المدينة الجامعية.
- أنه البنت السورية القادمة من الساحل "مبوجقة" وما بتعرف تعمل شي غير تبهدل وتضرب وتفجر. ( واصلا مو زابطة معها أبدا اللهجة)
- أنه في شباب بتفضل تتنكر على هيئة بنات لحتى تهرب من خدمة العلم.
- أنه مرت الضابط بتقدر تعمل من كوافير صبية وتأمنلها سكن جامعي من دون حسيب ورقيب.
- اذا الكوميديا هي مسبات وكلمات مو لطيفة، بتوقع على الكوميديا تبعنا السلام ..

بدي اعترف أني عملت مقارنة بسيطة بينه وبين فيلم "ما يطلبه المستمعون" يللي العسكري في بيركض من القطعة تبعه لحتى يشوف حبيبته ويرجع بنفس اليوم على الجبهة ويستشهد مشان بلده ونسمع غنية جايبلي سلام عصفور الجناين..

فكرت أنه ليش أفلامنا الجميلة هي مخباية بالدروج وما عم يشوفها شبابنا هيك نوع من الكوميديا الحقيقية ويللي ما بتقل أهمية عن أي رسالة وطنية حقيقية ..
وإذا الرقابة سمحت بعرض الفيلم تبع الكعب العالي من باب احترام السينما وأنها عم تصور مشاكل المجتمع يللي هي موجودة، بس فلتتفضل الجهات المعنية بتصويب الخطأ يللي عرضه الفيلم ويحلوا مشاكل كبيرة من دون بس عرضها على الشاشة والضحك عليها..

بالملخص، مافيني قول مافي كم مشهد اتضحكت عليون بس من مبدأ طلع ال 2500 ليرة يللي حطيتهم..