هل تستجيب المحافظة لشكاوى المواطنين بالفعل؟ كتب بسام هواري:
من فترة كان في مشكلة بردم حفرة ممتدة لمسافة 500 متر بشارع بغداد
خلفت تباين بمستوى الزفت بشكل كبير، هي المشكلة تسببت باذى لعدد من اصدقائنا ولهيك كان هالشي محفز لحتى بادر بالشكوى
لح شارك معكم آلية تقديم الشكوى
1. منكتب كتاب موجه لمحافظ او محافظة دمشق بمضمون المشكلة وكافة تفاصيلها (دون اي طوابع)
2. فينا نرفق صور للتوضيح اذا كان ممكن
3. منرفق صورة هوية المشتكي مع كتابة رقم الموبايل للتواصل
4. نقدم الشكوى في مبنى المحافظة بالطابق الخامس غرفة رقم 535 /مدير متابعة شكاوى المواطنين/
5. لح تاخدوا وصل بالشكوى مع رقم الشكوى للمتابعة
6. فيكم تكتفوا بتقديم الشكوى فقط وفيكم تطلبوا تقابلوا المحافظ
يلي صار معي
بعد العيد مباشرة اتصلوا فيني المحافظة وبلغوني بحضور
اجتماع المواطنين مع محافظ دمشق يوم الأربعاء الساعة 11:30
للي ما بيعرف، المحافظ مخصص يوم الاربعاء من كل اسبوع للقاء المواطنين ليسمع مشاكلهم بشكل شخصي
لح احكيلكم عن التجربة:
- الموظف بيتصل بكل الاشخاص يلي مقدمين طلب بشكوى او بلقاء المحافظ بشكل اصولي قبل بيومين
بشكل أصولي يعني مقدم الشكوى بكتاب ومرفق معها صورة الهوية ورقم الهاتف- الاجتماع بيحضره المحافظ وجميع مدراء محافظة دمشق لحتى تتحول الشكوى بشكل فوري للمدير المسؤول من لحظة الاستماع للشكوى
- لما قدمت الشكوى تحولت قدامي وانا قاعد للمدير المسؤول وشرح المشكلة بالتفصيل وعرفوا مين الجهة المسؤولة ووعدوني بحل المشكلة
- بعد ما طلعت من مبنى المحافظة بنصف ساعة اتصلوا فينا ورش الصيانة ليعرفوا العنوان بالتحديد ليدرجوها ببرنامجهم
يلي بدي قوله بختام هي القصة
انا كنت من الناس يلي بس بتتذمر وبتشكي بدون اي فعل او مسؤولية
وبدي البلد تكون احلى بلد بالعالم بدون ما حرك ساكن، وبعد تفكير لقيت اذا كل العالم بدا تفكر متلي مالح يتغير شي
.
لهيك قررت اول شي غير بحالي وبادر للتحسين وما قول هي مو شغلتي ودخلك مين لح يسمعني !
هي مسؤولية الكل، اليوم في فرص قدامنا لنحسن والقنوات عم تتوسع
.
لما بتشوف غلط .. بادر
بسام هواري Bassam ALhawarii
ليست هناك تعليقات:
إرسال تعليق