تجربتي مع معاملة جواز السفر السوري على المنصة الالكترونية!
لاحظت إنه في أشخاص حواليي حابة تجدد جواز سفرها بس مترددة من موضوع المنصة، ولذلك حبيت شارك مع الجميع تجربتي والخطوات والروابط اللازمة. أنا صرت مقدمة على المنصة طلب تجديد 3 جوازات سفر (2 عادي و1 مستعجل) والموضوع سهل وبسيط وحضارة بكل معنى الكلمة بس بده شوية تحضيرات كما يلي:
1. الدفع الكتروني حصراً، لذلك حساب البنك يللي بدك تدفع منه (مو شرط يكون باسمك) لازم يكون شغال وفيه ما يكفي من المال وبتعرف كيف تستخدم التطبيق الذكي الخاص بالبنك. جرب بدايةً بفواتير الكهرباء والمياه والاتصالات والموبايل لحتى تتعود على التطبيق ورح تكتشف إنه الحياة كثير أسهل بالدفع الالكتروني من تعب الدورة ومصروف المواصلات من كوة لكوة. ما في حساب بنك، فيك تفعل حساب وتعبي رصيد سيرتيل كاش أو mtn cash
2. جهز الملفات الالكترونية على الجهاز يللي رح تقدم منه: صورة باسبور، الهوية وجهان، الباسبور القديم أول صفحتين. الصور تكون واضحة وبدون فلاش أو ظل. الملفات لازم تكون JPG وحجمها أقل من 150 ك.ب.
3. ارسم على ورقة فاضية مستطيل طوله 8.5 سم وعرضه 2.5 سم. على اليمين من داخل المستطيل وقّع نفس التوقيع الموجود على جواز السفر، وعلى اليسار من داخل المستطيل ابصم بإبهام اليد اليسار. وبعدين اعمل سكان واضح لهاد المستطيل. الملف لازم يكون JPG وحجمه أقل من 150 ك.ب.
4. اتفرج على فيديو "حجز دور وتقديم طلب جواز سفر" الموجود على اليوتيوب وبيشرح كل الخطوات بوضوح.
5. هلأ صرت جاهز للتقديم. منفوت على رابط المنصة الالكترونية وتنشأ حساب باستخدام 3 معلومات (الرقم الوطني، رقم جوّال، كلمة سر من 8 محارف على الأقل).
ملاحظات إضافية للتقديم:
1. كون دقيق جداً عند إنشاء الحساب ولا تخربط بأي رقم وشغل الفيديو وامشي معه.
2. حاول تقدّم بأوقات العمل الرسمية مشان إذا صار أي مشكلة تقدر تتواصل مع الجهة المناسبة.
3. معاملة التقديم للأطفال بيكون من خلال حساب الأب أو الأم كمرافق.
4. إذا كان عندك جواز سفر فرح تظهر البيانات القديمة كما هي
5. لما بدك تستلم الجواز لازم تاخد معك نفس الصورة الشخصية عدد 2، الهوية، والباسبور القديم.
6. هاد الحساب احفظه عندك لأنه رح يلزمك بالمستقبل لكل المعاملات الحكومية (إخراج قيد، لا حكم عليه، بيانات، الخ) وخلى حساب البنك دايما عليه حركة وشغال.
7. الروابط يللي بتهمك كلها بالتعليقات
8. الباسبور الفوري تم تسليمه خلال 3 أيام، الباسبور العادي تقرّب دوره من شهر تموز 2023 لشهر تشرين الأول 2022
9. التكاليف:
تثبيت الدور قيمته 1000 ل.س والبنك عمولته 200 ليرة
معاملة الجواز الفوري قيمتها 302 ألف والبنك عمولته 800 ليرة
معاملة الجواز المستعجل حوالي المئة ألف
معاملة الجواز العادي حوالي 63 ألف
آلاء عبد الاله العظم
تفاصيل وروابط:
https://www.facebook.com/PublicAffairsBS/posts/pfbid0yPj4TrvGkp6pkKKEhUCyf2BWSu5CHM8BjyJtsVeRgJbqi36y4gqyDpqBE4iepivMl
Alaa Alazem
ليست هناك تعليقات:
إرسال تعليق