عن مركز خدمة المواطن بدمشق - المحافظة

سجّلت مايا حسن مشاهدتها اليوم من مركز خدمة المواطن بدمشق - المحافظة:
متل ما منحكي عن السلبيات يلي منشوفا بالمؤسسات الحكومية، من واجبنا نحكي عن النقاط الإيجابية. مراكز خدمة المواطن بمحافظة دمشق-خدمتكم تهمنا"

اليوم رحت لطلّع ورقة غير محكوم من مركز خدمة المواطن- النافذة الواحدة الموجود بساحة المحافظة. قبل ما روح كنت خايفة من الحكي يلي عم اسمعو عن العجقة والعالم يلي فوق بعضها وعدم التنظيم.

لما رحت، الوضع كان مختلف تماماً، صح في عجقة وهالشي طبيعي بس التنظيم كان ممتاز، بعد ما دخلنا وأخدنا الورقة يلي عليها الرقم التسلسلي للطلب قعدنا لننطر دورنا، كان في موظف بقاعة الانتظار عم يحرص انو الناس تترك مقعد بينا وبين الشخص التاني حتى ما يصير تماسّ، نفس الموظّف عم ينسّق بين الموظفين وكل ما فضي موظّف يبعت لعندو مراجع حتى قبل ما يجي دوره وهيك العالم عم تخلّص طلبا فوراً، لما خلصوا الطلبات كان في موظّف تاني عم يجيب الطلبات لقاعة الانتظار ويعطيها للمراجع لحتى ما يصير في تجمّعات بمكان واحد.

طبعاً الإجراءات المتبّعة هي إجراءات كتير مهمّة ولكن كل هالشي بيعتمد على وعي المراجعين وقديش عم ياخدوا اجراءات التعقيم المناسبة بعد ما يقعدوا على كرسي عم يقعد عليه كذا شخص أو يعقموا إديهم بعد ما يلمسوا سطح ما واذا ما اتخذوا هالإجراءات فكلّ حرص مؤسسات الدولة ما رح يكون اله أي جدوى للأسف.